مفهوم العار او الخزي من المفاهيم الي صعب علي استيعابها بسهولة، هل هي ذات نفع ام ضرر؟ بعد جولات من التفكير اتضح لي انها سلاح ذو حدين.
قبل ما نتكلم عن محاسنها او اضرارها خلينا نعرف ما هو العار، في نظري هو قانون، دستوره المجتمع، وعقابه هو العزلة او النبذ، يعني لو واحد عمل فضيحة، مفروض يحس بالعار لانه المجتمع حينظر ليه نظرة عار او نفر، والنظرة الدونية دي بتعذب متلقيها لانه بفطرة اي انسان انه ببحث عن الانتماء والانسجام مع المحيط. كمثال علشان اثبت انه العار دا قانون مجتمع، مثلا لو حمت في الشارع في السودان بشورت صغير، الناس حتقول عاين الود الما بخجل دا وماف واحد يمكن حتى يسلم عليك، بحيث انه لو عملت نفس الحاجة دي في قنوات امستردام، الموضوع عادي.
محاسن القانون دا واضحة طبعا لانها بتنظم التعاملات بين افراد المجتمع ومن دونها الحياة بتصبح عشوائية، بس برضو عندها اضرار، مفهوم العار دا حيقوقع صاحبه في النمط العام للمجتمع الموجود فيه، وما حيكون في مجال للتغير او الابداع، لانك حتكون خرجت من المنظومة، وبالتالي حتجلب انظار العار لانك شذيت. يعني مثلا لو وحدة قالت تسترزق بركشة علشان تاكل ايتامها، الناس حتتكلم! (للاسف).
برضو من الاضرار الغير مباشرة انه الواحد ما حيحاول يعمل حاجة خوفاً من انه يفشل فيها والناس تنظر ليه نظرة الفاشل (نظر عار برضو)، طبيعي الواحد يفشل علشان يتعلم لكن الناس ما بترحم. مثال اخير، جرايم الشرف، الواحد مستعد يقتل روح علشان بس الناس ما تنظر ليه نظرة عار، شايفين خطورته بتصل ياتو مرحلة!
كختام، لو حست بالعار من حاجة، اتذكر انه سبب العار دا نظرة المجتمع، ولحسن الحظ نحن في عهد بقدّر الفرد اكتر من المجتمع، يعني ممكن تجازفها من غير ما تحس انك منبوذ، الزمن اتغير 😉