الحظ ... هل بجي لاني محظوظ ولا لاني سعيت للاسف ماف جواب للسؤال دا، اتخيل انك عاوز تشتري قميص، عجبك واحد لكن لمن جربت المقاس ما طلع قدرك، حظك كعب مش!، طبيعي انك حتمشي تفتش قميص تاني في نفس المحل، يمكن تلقاه لو محظوظ! يمكن لا، حتضطرى تمشي محل تاني وهكذا حتواصل في السعي لمن تلقى واحد او ترضى بواحد ما عاجبك شديد لكن مقاسك او تنسى الفكرة. اتخيل جى معاك صحبك يساعدك في الشراء ولقى بنطلون عجبه وطلع مقاسه زط من اول محاولة، محظوظ مش؟
نفس الفهم دا بنطبق لمن تكون عاوز تفتش شغل ولا شريك ولا عاوز تشتري عربية او اي هدف انت عاوزه، ممكن تكون محظوظ وتلقى حاجتك من اول محاولة وممكن تسعى كتير علشان تلقى حاجتك، وممكن ما تلقى حاجتك وترضى بقسمتك، كله وارد. بس المشكلة انه لمن ما تلقى حاجتك من اول مرة تحبط وتوقف سعيك، مثلا المعاينة كانت بطالة تقوم تقول انا ما قدر الشغل دا، او مثلا مشروعك فشل توقف. واصل سعيك وكتر محاولاتك، امشي كم محل، كان ما لقيت في السوق الجنبك امشي السوق البعيد، خلي الحظ يجيك ما تستناه.